Hörður Torfason er leikari, leikstjóri, söngvaskáld og aktívisti. Hann var fyrsti þjóðþekkti Íslendingurinn til að koma út úr skápnum á opinberum vettvangi. Í kjölfarið hraktist hann tímabundið úr landi vegna hótana og áreitni. Hörður var einn þeirra sem stofnaði Samtökin ’78. Hann hefur verið virkur í baráttunni fyrir mannréttindum á mörgum sviðum og skipulagði meðal annars mótmælin sem urðu að búsáhaldabyltingunni árið 2009.