KIRKJUNNI KENNT UM

Sem sagt, ef auglýsingar, fræðsluefni og áróður væri gert þannig úr garði að það höfðaði til samkynhneigðra þá mundi það leiða til þess að gagnkynhneigðir, karlmenn og konur, tækju það ekki til sín. Já sko andartak. Það er í fyrsta lagi hægt að gera þetta hvort tveggja og í öðru lagi hverjir eru núna að smitast? Hverjir eru núna að veikjast? Hvar er þetta? Það eru samkynhneigðir karlmenn! Þá sagði hann [landlæknir]: Já það er nú bara þannig að það er bara til að vekja enn þá fleiri fordóma upp. Kirkjan er nú ekki hrifin af þessu og konur, það er nú kona sem er heilbrigðisráðherra,  Ragnhildur Helgadóttir, þær eru nú ekki hrifnar, þær eru á móti þessu. Það er nú ekki sniðugt, við fáum bara yfir okkur ennþá fleiri viðbrögð.

Þekkir maður nú þessa sögu. Það er verið að skýla sér, eigin fordómum, bak við fordóma annara. „Þeir vilja það ekki, þess vegna get ég það ekki. Það er ekki það að ég vilji þetta ekki en það eru aðrir hér sem eru á móti þessu“.  Og þetta er náttúrulega bara eins og hver önnur bölvuð lygi. Við Böðvar, við létum okkur hafa það að fara og tala við séra Pétur. Herra Pétur Sigurgeirsson biskup. Við pöntuðum viðtal og fórum til hans og hann tók á móti okkur og blessaði okkur í bak og fyrir. Hvað segiði drengir mínir dadadada svona afskaplega alúðlegur eldri maður. Við förum að segja honum þetta og hann fer að spyrja hvernig þetta sé allt saman og já ég skil þetta og ég veit þetta og ég kannast nú við þetta það eru til menn sem að hafa þessar tilfinningar. Það er nú betra ef þeir geta átt konu og eignast börn þá er það nú betra, en ef þeir geta það ekki þá verður nú bara að hafa það. Þá verða þeir bara að lifa sínu lífi og þá sögðum við já þetta er nú svona; landlæknir, heilbrigðisyfirvöld, aðstoðarlandlæknir segir að þeir geti ekki auglýst fyrir þetta fólk því kirkjan sé á móti þessu. Þá horfir hann á okkur og kom algerlega af fjöllum og segir um hvað er hann að tala maðurinn? Þetta er bara bull. Þetta er bara þvaður, skilurðu. Þá var þetta nákvæmlega að þeir vildu ekki tala um eitthvað … þeir treystu okkur ekki til að segja satt og rétt frá greinilega því við vorum ekki með háskólapróf í þeirra fræðum, […] eins og við hefðum einhvern áhuga á að fara að ljúga einhverju?

Brot úr viðtali við Veturliða Guðnason, 2005